SHARE

Ti po flen, unë po pres

Po pres
E ti hala s’je zgjua
Gjumë dimni me andrra t’fshtira
Lidhë t’paska me kulpnajë
Rrugshkretave që gjurmë hanë
E s’lanë m’u kthye e s’lanë me shkua
e ec e qaj

Po pres
E ti hala s’je zgjua
Se s’kputen leht andrrat
Me dhamtë e kalbun t’natës
As mua kamtë e thyeme s’m’ngjiten
E zani s’m’kthehet ma
Me t’thirrë te dera
E ti m’u çua

Ti po flen
E unë po pres
Me ra terri m’u zan hana
E ujkut qimet me iu ndrrua
Lakuriqit me i ardhë syni
Unë me vdekë
E ti m’u çua

Prishtinë, Kurriz, 20 janar 2019

 

Përtej ikjës e kthimit

Mos e vrajë shpirtin me mallin e tepruem
Tue ecë përtej dhimbjës sate
Se koha s’ta falë Galë
Nanë e mirë e fëmijve t’mi
Mos ecë kujtimeve e rrugës vajit
Se zija shëndrrohet n’vetmi
E zor se i kthehësh vetës
E zor vetja ty

Behari s’çelë gjithmonë për secilin
I pata thanë edhe bijës sate-sime
Njiherë n’çaste dëshpërimi
As zogjët s’i knojnë çdo pranvere
Kur u bahet vonë Kot rrezitë dielli pastaj
E kot vargje zjarmi prej Hikmeti
S’dehemi me kupa Khajami ma
Mos dil përtej mendjës

Mos ik shikimit se kthehësh e zbrazët
E s’ka pasqyrë që t’i duron flokët e thime
E sytë e verbuem
S’ta falë fryma e bimës sate n’univers
S’jemi lule me çelë pranverave
E me ngreh çerdhe t’reja si Lejlekët
Rri n’lkurën tande deri t’çkyhet
Ani çka nëse s’asht ma e lëmueme
Mos shko përtej seç mundësh
Se digjën andrrat për Bubën tande
N’sytë e krypun
E shuhësh

 

Mall andrrash

Sa mirë që heret u zgjova
Shpendë mbi çati tue çukatë pashë
Shikova orën e prap me fjetë
N’krahun tjetër rashë

*Ti erdhe e veshun me lecka
Por e qeshun
Mua m’gjete t’grimosun
N’shesh xhirimi bukë tue ngranë
Sa shumë u shikuem e s’folem
Sikur s’patem çka me thanë

*Dy rriska buke n’lang djathi t’i zbuta
Amël t’fola Ha mirake se faqekuqe ke m’u ba
( Kështu m’thojke ime amë )
Dhe gjumit u zgjova
Ty T’lashë tue ngranë

14 Mars 2019

Çun Lajçi