SHARE

LIRIA

Mbi fletoret e mia shkollore,
Mbi bankën time prej dërrase,
Mbi rërën, mbi pemët e retë
Ty emrin ta shkruaj.

Mbi gjithë fletët e shkruara,
Mbi gjithë fletët e bardha,
Mbi gurin, gjakun e hirin
Ty emrin ta shkruaj.

Mbi ëndrrat e mia të arta,
Mbi armët e larta të trimave,
Mbi kurorat e mbretërve thinjoshë
Ty emrin ta shkruaj.

Mbi xhunglat e shkretëtirat,
Mbi çerdhet e zogjve dhe barin,
Mbi gjurmët që la fëmijëria
Ty emrin ta shkruaj.

Mbi mrekullitë e netëve verore,
Mbi bukën e bardhë të drekës,
Mbi stinët ku ziejnë fejesat
Ty emrin ta shkruaj.

Mbi leckat dhe zhelet mëngjesore,
Mbi diellin e pellgut dhe myshqeve,
Mbi hënë e mbytur liqeneve
Ty emrin ta shkruaj.

Mbi fushat, mbi horizontet,
Mbi krahët e zogjve të qiellit,
Mbi krahët e mullinjve të hijeve
Ty emrin ta shkruaj.

Mbi çdo shpërthim të autorës,
Mbi dete, varka, vaporë,
Mbi majën e malit të çmendur
Ty emrin ta shkruaj.

Mbi shkumën e bardhë të reve,
Mbi ballin me djersë rrufeje,
Mbi shiun e dendur të vrenjtur
Ty emrin ta shkruaj.

Mbi hijet që shuhen e feksin,
Mbi zilet e vogla të ngjyrave,
Mbi ligjet e forta fizike
Ty emrin ta shkruaj.

Mbi shtigjet malore që zgjohen,
Mbi rrugët nëpërka vrapuese,
Mbi sheshet e rrethuar hendeqesh
Ty emrin ta shkruaj.

Mbi llampën e ndezur në mbrëmje,
Mbi llampën e shuar mëngjesit,
Mbi gjithë shtëpitë ku fjeta
Ty emrin ta shkruaj.

Mbi mollën e prerë përgjysmë,
Mbi dhomën e gjumit dhe punës,
Mbi guacëkn e zbrazët të shtratit
Ty emrin ta shkruaj.

Mbi Balon tim përkedhelës,
Mbi veshët e tij përpjetë,
Mbi putrën e lodhur përtace,
Ty emrin ta shkruaj.

Mbi pragun tim të shtëpisë,
Mbi gjërat e ngrohta të jetës,
Mbi valët e zjarrit të shenjtë,
Ty emrin ta shkruaj.

Mbi mishin e gjakun e shtrenjtë,
Mbi ballin e miqve të dashur,
Mbi gjithë duart që zgjaten
Ty emrin ta shkruaj.

Mbi xhama dritaresh habie,
Mbi buzët që presin të çelen
Me mall pa mbarim e në heshtje
Ty emrin ta shkruaj.

Mbi strofkën e shembur ku fshihesha,
Mbi faret e mia të dërmuara,
Mbi muret e mi të mërzive
Ty emrin ta shkruaj.

Mbi frymën që vjen pas lëngimit,
Mbi dhëmbët kanosës të fatit,
Mbi shpresën pa gjumë kujtimesh
Ty emrin ta shkruaj.

Për hir të pushtetit të madh të një fjale
Filloj përsëri të marr jetë,
Kam lindur të njihemi bashkë,
Me emrin tënd të të flas:

LIRI

(Shqipëroi: Dritëro Agolli)